طريقة توصيل الكومبيوتر بالتلفزيون

من طرف **Catalony 4 ever** السبت يناير 17, 2009 6:52 pm

بسم اللله الرحمن الرحيم
احب ان اقدملكم الشرح على كيفية ربط الكومبيوتر بشاشة التلفزيون
طريقة توصيل الكومبيوتر الى التلفزيون

توصيل الكمبيوتر الى التلفزيون:
---------------------------------
عملية توصيل الكومبيوتر بشاشة التفزيون(التلفزيون او التلفاز) هي مجرد عرض الوندوز على شاشة اخر

كالتلفزيون غير
شاشة الكومبيوتر
وهاي العملية تصير بواسطة فتحة موجودة اسمهة

TV OUT الي موجودة بكارد الشاشة وتربط وية التفزيون بكيبل خاص
هذا الكيبل اكثر شيئ يجي وية كارد الشاشة بس تكدر تلكاه باطوال وانواع مختلفة بالسوك
هاي العملية طبعا
تفيد المخابيل مال الالعاب من امثالي ذولة المسطلين على الالعاب
اربع وعشرين ساعة وخالي.....ادكلك شاشة 32 بوصة لو 65 بوصة بلازمة وتكعد تلعب ونظام ساوند سيستم كامل
علمود اتضل تتلفت منا ومنا وزوج اللي يروح للدوام هاي بس المخابيل امثالي لاتخافون
واكو يستعملوها حتى يشوفون الافلام على شاشات اكبر والوان احلى حتى يستفادون من اقصى دقة ووضوح للفلم
يعني الافلام من جماعة ال HD
وايضا مفيد الى اللي يشتغلون في مجال المونتاج وتحرير الفيديو لاظهار الصورة بادق التفاصيل وازهى الالوان
وحجم اكبر على شاشة التفزيون
واكو بعد يستخدمون علمود يكدرون يعرضون الشروحات ولاعمال خاصا في الموتمرات والندوات مال رجال الاعمال
ومااعرف شنو.......المهم نرجع لموضوعنة

يجيلك واحد يسالك يكلك كل كروت الشاشة بيهة تي في اوت؟
الجواب يابعد عيني تكدر تكول كل الكروت هسة الموجودة بالسوك حاليا بيهة هاي الفتحة TV OUTفي جميع الماركات سواء كان Nvidiaاو ATI الا اذا جان كارد الشاشة مالتك من زمن جدي فتعذرني خوية
والفتحات مال التيفي اوت على نوعين هما:
1- ألفتحة ألصفراء :Composite
يصير لون هاي الفتحة على الغالب لونهة اصفر بس في عدد قليل نوعيات يصير لونهة اسود
وتلكة يمهة كتابة بلانكليزي TV-OUT
وهاي شكلهة

وهاي الفتحة يستخدمون وياها كيبل يسمونة
Composite Cable يصير بيه راسين ولونة مرات اصفر واحد يروح لفتحة كارد الشاشة والثاني يروح للتلفزيون

وحتى مرات تلكة نفس اللون على الفتحة مال التلفزيون ومكتوب يمهة VIDEO

2- ألفتحة ألسوداء S-video
والهة اسم همالتين يسموهة سوبر فيديو وبيهة هواي ثقوب ومكتوب عليهة TV OUT

وبعض انواع كروت الشاشة تصير لونهة اصفر وخاصة الابتوب

ونستخدم الكيبل مالتهم الخاص يسمونةS-video بيه فتحتين ولونة اسود على الاكثر حتى نربطهم
اوكي ......اوكي

ولازم تتوفر هاي الفتحة بالتلفزيون حتى نكدر نربطهم كما في الصورة (باوع عدل)

واذا ماكو بالتلفزيون مالتك ها خوية هاي الفتحة مال السوبر فديو S-video لازم تستخدم كيبل محول من الS-video الى Composite حتى علمود نوصل الكومبيوتر بالتفزيون Composite Cable

واكو كروت شاشة بيهة النوعيتين مال الفتحة مال الفديو اوت للتلفزيون وعلى راحتك بعد شتريد هههههه

بس ديربالك هاي الفتحة بس مال صورة مو مال صوت يعني الصوت لازم تركبة بالكيبل مال الصوت

يعني الراس الاسود اللي بالصورة الفوك على اليسرة يربط بالحاسبة من خلال كارد الصوت والراس الاحمر ولاسود على اليمنة يربط بالتلفزيون بالفتحتين مال الصوت الاحمر والابيض ....اوكي(باوع الصورة اخي المباوع)

بس اكو نوعيات مال تلفزيونات قديمة او تكون تجارية هاي مابيهة فتحات للفديو الصوت بس اكو تحويلات على شكل مشط يسمونة Scart تركبة بالتلفزيون من خلال الفتحة وتربط ....خزش (شوف الصورة)

بعد ما انتهينة من عملية التوصيل للكومبيوتر والتلفزيون هسة نجي نسوي للحاسبة ري استارت(اعادة تشغيل)
__________________________________________________ __________

بوية ........خلصنة هسة نجي لضبط الاعدادات وهاي اهم شيئ ...(تابع وياي عزيزي المتابع)

1- ضبط اعدادات كارت الشاشة لكروت ATI
---------------------------------------------

بعد ماانتهة التحميل مال الوندوز نجي على الايقونة مال ATI الي يم الساعة او تصير بسطح المكتب حتى نضبط الاعدادات....
راح تطلعنة هاي الصورة حسب هذا الاصدار من التحديث ATI CATALYST CONTROL CENTER 5.6

نختار Display Option الي موجود على اليسرة وناشر على المربع الموجود جوة(نخلي علية غلامة صح) Force TV detection بعدين اتدوس Apply

بعدين تروح Displays Manager الي موجود على اليسرة وتشوف ايقونة التلفزيون تصير جوة ايقونة شاشة الكومبيوتر ...... بعدين نسحب ايقونة التلفزيون الى المربع الفارغ الي يم ايقونة شاشة الكومبيوتر(بس مو المربع الي في الوسط) وبعدين تطلعلك عدة خيارات تختر انتة من عدهة الاختيار الاولClone Main with TV حسب الصورة بعد اخوك....دحك عدل

بعدين تطلع رسالة على الموافقة على التغير تضغط انتة Yes .....وانظر الصورة بعد عيني

بعدين نروح الى اختيار TV Properties 3 على اليسرة وحتى نضبط الالوان نختار Formats وتشوف ثلاثة اختيارات تختار انتة من عدهن الاختيار الثالث Select by signal format وبعدين تختار نظام الالوان في البلد وتضغط Apply كما في الصورة

واكو بعض الخيارات في TV Properties 3 حتى تنطيك اكثر تحكم بالالوان والبريق والحجم وضبط الصورة حتى تطلع توب (بعد هاي ضلت يمك) ...... وبعدين اتدوس اوكي
وهيجي اعزائنا المشاهدين قد انهينة معاكم شرح على كيفية توصيل الحاسبة بالتلفزيون وضبط الاعدادات على كارد شاشة نوع ATI..

2-ضبط اعدادات كارت الشاشة لكروت nVidia
-----------------------------------------------
هسة اهناة انشغل الاعدادات الخاصة nVidia ونضغط على الايقونة nView الي تصير يم الساعة(جوة) او تضغط على الزر الايمن للماوس على سطح المكتب وتختار properties من القائمة حتى تطلعلك هاي الصورة حسب هذا التعريف ForceWare 77.72 لكروت nVidia

نختار setting وبعدين نختار Advanced بعدين نختار الاسم مال كارد الشاشة والي هوة اهنا موديل GeForce MX 440 (شكد قديم ادري لان هذا اول كارد شاشة الي جان سعتة 32 ميكا بايت هسة لا الحمد لله)

بعدين تختار Tools من القائمة وبعدين نأشر على المربع Force TV detection وبعدين تسوي(تطفي الحاسبة وتروح تنام احسلك) ريستارت للحاسبة -اعادة تشغيل-

بعد ماسوينة ري يستارت اعدادات كارد الشاشة مرة ثانية حتى نكمل باقي الخطوات (هاي وين رايحين عبالكم خلصتوا ههههههههه راح اموت من الجوع من ورة الكتابة)
وبعدين نختار nView display setting من القائمة على اليسرة ونختار Clone وبعدين نضغط Apply

بعدين تظهر رسالة تاكيد وتضغط انت بعدين Yes باوع الصورة

بعدين نضغط بزر الايمين للماوس على ايقونة التلفزيون 1b ونختار Select TV format وبعدين تختار نظام الوان البلد وبعدين تضغط Apply
وتكدر همة تغير حجم والوان الصورة من خلال Color Correction و Device Adjustments من القائمة ادناه

وهكذا اعزائي المشاهدين نكون قد انهينا عملية توصيل الحاسبة بالتلفزيون وضبط الاعدادات بالنسبة لكروت الشاشة نوع nVidia

اخوان ترى تعبت علية هذا الشرح فعلى الاقل كلولي رحمة لوالديك مشكورين عمي قيموني اذا كلش ماعدكم وان شاء الله بخدمتكم