كيفيه عمل الفورمات شرح مفصل

من طرف **@IraQ DeviL@** الأربعاء يناير 14, 2009 3:17 am

السلام عليكم شلونكم اعضاء ديفل نت
انشاء الله تكونون بالف خير

اليوم حبيت انزل موضوع عن الفرمته
حتى بعد متروحون لمكتب حاسبات ويظلون يتفيكون بروسكم :laeem:
انشاء الله يا رب تستفادون منه

وهسه راح اكتبلكم الخطوات الي تسوها حتى تدخلون على صفحه البووت
البووت: ويعني الاقلاع او المصدر الي تاخذ الحاسبه منه المعلومات حتى تشتغل
مثل (الهارد ديسك,السي دي روم)
1-اذا نريد ننصب ويندوز على الحاسبه اول شي نسوي لازم نخلي البوت من السي دي روم
ليش؟؟؟؟؟؟
حتى ياخذ برنامج الوندوز الي تريد تنصبه من السي دي
شلون نخليه يبوت من السي دي روم؟؟
ندخل على صفحه البايوس
والي هي صفحه تحتوي على معلومات الاجهزة الموجودة بالحاسبه
شلون ادخل للبايوس؟؟؟
كل موثر بورد اله بايوس يختلف شووووية عن الثاني
من نريد ندخل للبايوس بالبدايه اول متشتغل الحاسبه وتطلع الصفحه السودة
نضغط F2 او F11 او Del
حسب الموثر بورد
راح تطلع صفحه بيها معلومات الاجهزة الموجوده بالحاسبه
ندور على كلمه boot
او advanced bios features

حسب الموثر بورد

ونروح على كلمه

boot device priority

والي معناها اسبقيه اجهزة البووت

والي من عدهه تكدر تختار منو اول جهاز تبوت منه الحاسبه

من تدخل على هذا الخيار راح يطلعلك الاجهزة الموجودة عندك حسب ترتيبها بالبوت

مثلا

first boot device :cd/dvd

ومعناها ان البووت راح يصير من السي دي روم اول شي

اذا كان اكو قرص وندوز واذا لا راح يبوت من الهارد ديسك

حنه اذا نريد ننصب وندوز لازم نخليه يبوت من القرص

اذا ما لكيتوه مثل المثال الي فوك سوه انتوا مثله

وبعدين اضغط F10

حتى يخرج من صفحه البايوس مع حفظ العمل الي سويته بالصفحه

هسه راح ترست الحاسبه وتريد تتدخل للوندوز بس هالمرة كبل ما تدخل راح يطلعلك مسج يكول

boot from cd/dvd

press any key to boot from cd....

انت بهاي الحاله عليك ان تضغط اي مفتاح حتى تدخل على تنصيب الوندوز

بعد ما ضغطت اي مفتاح ودل للتنصيب راح تطلع شاشه زرقاء

ويبدي يتفحص الاجهزة الموجودة بالجهاز

راح يكوولك اذا تريد تنصب ويندوز جديد اضغط enter

اذا تريد تخرج اضغط f3

اضغط انتر

راح تجيك تعليمات ورخص استخدام الوندوز للموافقه عليها انطيه f8

هسه راح يدور اذا جان اكو وندوز منصب سابقا بالحاسبه

اذا لكه وندوز راح يكوولك

اذا تريد اصلاح للوندوز اغط r

اذا متريد تصلحه اضغط esc

واحنه عادة نضغط esc

حتى ننصب نسخه وندوز فريش

راح يطلع البارتشنات الموجودة بالحاسبه

البارتشنات (السي والدي والاي...الخ)

حتى تختار وين تريد تنصب الوندوز

عادة احنه ننصب الوندوز بالسي

نضغط انتر عالسي

راح ينطيك رساله تاكيد يكولك
اذا تريد تفرمت الوندوز الي بالسي اضغط f

هم راح تطلع رساله تكولك متاكد من انك تريد تمسح محتويات السي اظغط L

هسه راح يطلع 4 خيارات او خيارين

حسب الهارد

اختار

Format partition....(Ntfs)

اهم شي كون NTFS

من تختار
راح يبدي يفرمت

من يخلص فرمته راح يبدي يسوي كوبي لفايلات التنصيب ويروحن للسي

من يكمل الكوبي

راح يطلع شريط احمر يحسب تنازلي من 15

ويكولك رست اذا ما رستت ترست تلقائيا ورة ال15 ثانيه

من ترست ادخل عالبايوس مرة ثانيه

هالمرة خلي الهارد ديسك الاول

حتى تبوت الحاسبه من الهارد بعد

بس لا تطلع قرص الوندوز

وهم من تطلع دوس F10
حتى يحفظ التغيرات

راح يدخل على تنصيب الوندوز والي تكون مدة تنصيبه 39

دقيقه

من يوصل التنصيب للدقيقه 33

راح يطلب منكم معلومات

لغه الحاسبه انت هسه عوفها راسا انطيهه نيكست

اسم الحاسبه والشركه

انطيه الاسم الي يعجبك

والنوب انطيه نيكست

راح يطلب منك الباسوورد الي يجي مع نسخه الوندوز الجاري تنصيبها

(كل نسخه وندوز الهه باسووردها الخاص)

والي عندي ودائما استخدمه هو windows xp sp2

وهذا باسوورده

QW4HD-DQCRG-HM64M-6GJRK-8K83T

المهم دخلتوا الباسوورد

وانطيتوه نيكست

راح يطلب منك التوقيت والتاريخ

ضبطهن

وجوة راح تشوف قائمه منسدله من تفتحها راح تلكى التوقيتات العالميه

دور على بغداد مكتوب يمها +3

وانطيه نيكست

راح يكمل

من يخلص راح يطلعلك

صفحه زرقه وبيها جوة نيكست اطلبها

راح ينطي خيارات تفعيل جدار الحمايه

اختار الي جوة الدرع الاحمر

ونيكست

راح يطلعلك خيارين

SKIP و NEXT

النيكست مو فعاله

اختار SKIP

راح تتفعل واختارها

راح يكولك ادخل اسم المستخدم للحاسبه

وينطيك خمس فراغات انت بكيفك كم مستخدم تريد

عادة اسوي مستخدم واحد بالاسم الي يعجبني وانطيه نيكست

راح يشتغل الوندوز وبعد يبقى عليكم التعريب وتعريفات الاجهزة وكارت الشاشه

واي سؤال عدكم اني بالخدمه

من طرف **لمسـة حنــان** الأحد يناير 18, 2009 7:46 am

يسلموووو مديرنا
شرح كافي ووافي
عاشت ايدك والله
لا تحرمنا جديدك

مع ودي
*||* لموووسة *||*

من طرف **ساحرة** الجمعة يناير 23, 2009 7:22 pm

موضوع مهم وشرح مفصل وواضح
ولو اني ماافرمت........معتمده
اكو من يفرمتلي
ومن افضل الخبراء بمجالهم
الله يخليهم الي
تقبل كل الحب والاحترام

::j::

من طرف **@IraQ DeviL@** الجمعة يناير 23, 2009 11:24 pm

لمسـة حنــان كتب:
يسلموووو مديرنا
شرح كافي ووافي
عاشت ايدك والله
لا تحرمنا جديدك

مع ودي
*||* لموووسة *||*

وايدج العايشه مشكوووووورة عالمروووووووووور

من طرف **@IraQ DeviL@** الجمعة يناير 23, 2009 11:27 pm

ساحرة كتب:

موضوع مهم وشرح مفصل وواضح
ولو اني ماافرمت........معتمده
اكو من يفرمتلي
ومن افضل الخبراء بمجالهم
الله يخليهم الي
تقبل كل الحب والاحترام

::j::

اهلا وسهلا بساحرتنا منووووووورة الموضوع بطلتج

من طرف **ساحرة** السبت يناير 31, 2009 2:09 am

كيفيه عمل الفورمات شرح مفصل

كيفيه عمل الفورمات شرح مفصل

رد: كيفيه عمل الفورمات شرح مفصل

رد: كيفيه عمل الفورمات شرح مفصل

رد: كيفيه عمل الفورمات شرح مفصل

رد: كيفيه عمل الفورمات شرح مفصل

رد: كيفيه عمل الفورمات شرح مفصل